ยังมีหมาขี้เฮื้อนตัวนึ่ง แอ่วไปที่บ้านคนใดก็ชังขึ้นเฮือนก็บ่ได้ ไปก๋ายก็ “หมาขี้เฮื้อนมาหั้นละ” คนไล่บุบ หมาก็หนีเข้าไปป่าจะไปหื้อเสือกิน เสือก็ตึงบ่ากิน หมาขี้เฮื้อนออกจากคนไปก็เข้าป่าเข้าดงไป ไปปะใส่พระฤาษี มันมานอนที่พื้นอาศรมเปิ้นหั้นนะกะ เปิ้นก็เอาเข้าเอาหยังหื้อกิน โอ้ เอายาเข้าใส่หื้อเหีย หายไปดีก่านิ
“หมาฮู้คำแท้เนอหมาตัวนี้ ฮื้อ ใคร่หื้อมันเป็นคนน้อ เอาหื้อมันเป็นคนเหียกำเต๊อะ” ก็เนรมิตหื้อเป็นคน หมาขี้เฮื้อนนั้นหนา เป็นคนมาก็..โถ...ปฏิบัติขัดสีพระฤาษีอยู่หั้นเนาะ
“เออ ไอ่นี้มันก็ง่อมลู้ เซาะเมียหื้อมันเหียคนฮะ”
ไอ่นั้นหลับละกะ เอาดูกขี้ข้างมาเหียซี่นึ่ง เอามาเป็นแม่ญิงเนรมิตแม่ญิงหื้อมัน อยู่กับกันไปพร้อม พระฤาษีก็เนรมิตบ้านหื้อมันที่นึ่ง มีบ้านมีจอง มีข้าคนมนตรี กำนั้นกะมีข้าคนมนตรี อยู่ทุกอย่าง บ่ได้ทุกข์ได้ฮ้อนหยังละ อันใดกะมั่งกะมีหมดละกอนไปแอ่วหาพระฤาษีกำใดก็ “เออ พญาหมาขี้เฮื้อนมาแอ่วโละนี่” มันฟังก็เคียดหื้อเปิ้น อั้น หมาขี้เฮื้อนนั่นหนา
“เอ๊ กูนิ ถ้าพระฤาษีตายเหียท่าบ่ามีไผฮู้เรื่องกูน้าจำฆ่าเหียกำก่อนนิ”
หมาขี้เฮื้อนตัวนั้นมันเป็นคนแล้วลู่ กำนั้นกะไปกะนิ ไปที่พระฤาษีกะนิ เอาลูกน้องปล้องปลายไปหมดเลาะนิ จะไปฆ่าพระฤาษี พระฤาษีหันก็ว่า
“เฮ้อ ไอ้พญาหมาขี้เฮื้อน คิงจะมาฆ่ากูกะ” แล้วก็ถ่มน้ำลายใส่ มันกลายเป็นหมาขี้เฮื้อนอย่างเก่า