เสี่ยวฮัก มันเอาเสี่ยวมันมาบ้าน เขาเป็นคนทุกข์คนยาก บ่มีข้าวกิน ทีนี้มันก็ไปอาบน้ำมาเมื่อค่ำ มันก็ดังไฟหื้อเสี่ยวมันหิง เอาผ้าต่องคลุมหื้อ เอาผ้าต่องตัวเก่านั้นเนาะคลุมหื้อ แล้วมันก็ไปเซาะข้าวสุก เมียมันก็นึกว่าผัวมันนั่งหิงไฟ ล่นมา เอาหัวเมอะกับหลังเสี่ยว
“โอะ บ่หล้างข้าวก็บ่มี เอาเปิ้นมาเฮือน”
“เออ ข้าห่อมาแล้ว
ทีนี้ผัวมันปิ๊กมาก็มากินข้าว เอาปลาทูมากิน ลูกมันมีอยู่หั้นก็นั่งส่อง
“แม่ๆ จะไปกินข้าวกับเปิ้นเน่อ ถ้าเปิ้นกอนแล้วค่อยกิน”
มันไปอยู่หั้นส่องเปิ้นกิน เปิ้นกินปลาทูผากหนึ่งเสี้ยง เปิ้นก็ปิ้นแหมผากหนึ่ง ลูกว่า “แม่ๆ เปิ้นปิ้นแล้ว”
ฮอดต่าจะนอนก็บอก “แม่ๆ เอาสะลีออกมา” เมียมันก็ขาบอยู่ในหั้นเนาะ
“แม่ เอาสะลีออกมาหื้อพ่อเสี่ยวโละ” เมียมันก็เหลือวิสัยแท้ ก็เอาผ้าก้อบโจ้งออกมา งิ้วฟุ้งเต็มหอเต็มเฮือนหั้น มันก็เมือเหียนา มันยังบ่หลาบเตื้อ ปิ๊กมาแหมละ เมินๆ นานๆ ก็ปิ๊กมาแหมละ เสี่ยวมันก็บ่มีอยู่เฮือน เมียมันอู้ว่าผัวมันบ่มีเฮือนก็รับต้อนอย่างดีเนาะ
“พ่อเสี่ยวลุกบ้านมาก๊ะ เออ พ่อเสี่ยวเหย บ่าเดี่ยวนี้พ่อละอ่อนมันบ่เหมือนตะก่อน มันเป็นผีบ้า กันไผขึ้นเฮือนมามันก็เอาแก่นต่ำค่วนก้นเปิ้นอี้นา กันเป็นคนอื่นข้าตึงบ่บอก อันนี้เป็นพ่อเสี่ยวนะข้าถึงได้บอก” พ่อเสี่ยวก็กลัว ฟั่งเมือ ฟั่งลงเฮือนมาเหีย กำเดียวผัวมันเข้าบ้านมา
“เออ มาบ่ะเดี่ยว พ่อเสี่ยวพองหาลงเฮือนไปนี่ มันขอแก่นต๋ำข้า ข้าบ่หื้อ”
“โฮ แก๋นต่ำบ่ดาย สูบ่หล้างจะขาง” มันกำแก่นต๋ำล่นตวยก้นเสี่ยว มันฮ้องตวย
“เสี่ยวๆ” กันเสี่ยวเหลียวผ่อมันยื่นแก่นต๋ำหื้อ
“เอ๊าะ”
ปู่นั้นหวังว่ามันจะเอาค่วนก้น ซ้ำล่นติกๆ ตั้งวันนั้นมันบ่มาแถมซ้ำ