เมียมันใคร่หื้อผัวมันตาบอด มันก็เลยไปไหว้พระเจ้า ทีนี้ผัวมันฮู้ว่าเมียมันจะไปไหว้พระเจ้า มันก็ฟั่งไปก่อน ฟั่งไปอยู่ทางหลังพระเจ้า เมียมันก็เข้าไปกราบไปไหว้ว่ายะจะใดจะหื้อผัวมันตาบอด พระเจ้านั้นก็ปากคือผัวมันนะ
“โหะ ไปยากหยัง ถ้าจะใคร่หื้อพ่อออกตาบอดก็เอาเหล้าดีๆ สักขวดหนึ่ง ต้มไก่ หื้อเอาไก่แม่ดำเน่อ ไก่แม่ดำสองตัว ที่มันมีไข่ เอาไปสู่มันกินเต๊อะ ตามันตึงบ่หันละ” เมียมันก็ฟั่งมาบ้าน มาแผวเมื่อแลงก็เซาะไก่ดำมาต้มเอาเหล้าเด็ดๆ มาหื้อผัวมัน
“สู วันนี้จะเลี้ยงสูหื้อกินดีๆ ลำๆ” ผัวมันก็กิน ใส่เหล้า กินแล้วหลับ พูกเช้าลุกมา มันก็ว่า
“โห ตาข้ายังบ่หันหาสูง หา”
“โห ไปฮู้ได้จะได”
“สู เอาเหล้าเอาไก่มาหื้อข้ากินเนี่ยะ ตาบ่หัน บ่าเดี่ยวนี่น้า เอาน้ำมาหื้อข้าลอ” แต่งงมๆ ซวามๆ ไปทีนี้มันก็ใคร่ลองว่ามันจะตาบอดแท้กา เมียมันก็เอาข้าวมาตากที่ชาน
“สู นั่งนี่ ผ่อข้าวผ่อไก่เน่อ จะไปหื้อไก่มากินข้าว”
“โห ข้าจะไปหันจะใดเนี่ยะ”
“ก็ฟังเสียงมันสับมันหยัง ก็ไล่มันไปกะ”
“เออๆ” ทีนี้มันก็ย่องๆ ไปเปี๋ยดุ้นหลัง มันฮู้แล้วว่าเมียมันนะจะมาสับ กำเดียวเมียมันก็มา แต่งขึ้นมาสับข้าวก๊อก ก๊อก ก๊อก
“เซอะๆๆ” มันก็ไล่ไก่หื้อไป
กำเดียวเมียมันก็มาสับข้าวแหม มันก็เอาค้อนขว้างจดเข้าไปที่หน้าผากเมียมัน เมียมันก็ฮู้ว่ามันตาบอดแท้ลู่ ใส่แผล ใส่ยาอะหยังดีแล้ว ทีนี้ก็นัดชู้มาเล่น บอกว่า
“บ่ถ้ากลัว ผัวข้าตาบอดแล้ว มาเต๊อะ”
ผัวมันหันเมียมันนัดชู้มา มันก็แต่งบ่หัน เมียมันก็เอาชู้มันไปนอน ไปกอด ไปเล่นเมื่อค่ำเมื่อคืน ทีนี้ตกมาเมื่อเช้ามันจะไปจ่ายกาด ทีนี้ชู้มันจะเมือ มันก็ว่า
“อยู่เนี่ยะๆ บ่ต้องเมือ อยู่เนี่ยะ ข้าจะไปจ่ายกาดกำเดียวจะมา”
“ยะจะใด จะหื้อข้าไปอยู่ไหน”
มันมีไหอยู่แก่นหนึ่ง ทีนี้มันก็เข้าไปอยู่ในไหนึ่งเมี่ยง ไอ่คนที่แกล้งตาบอดมันก็ฟั่งไปต้มน้ำจนน้ำเดือดมันก็เอามาหล่อใส่ไห ชู้ของเมียมันก็ตายขำในหั้น มันหล่อน้ำเดือดแล้วก็ไปหายสอย เมียมันมาก็บ่ไปผ่อผัวมันเตื้อ สดเข้าไปที่ไหของชู้มัน ไปผ่อ ตาเหลือกสากกาก
“ปอดท้อ เนอะ ทำตาเหลือกสากกาก เกี้ยดหื้อข้าไปกาดเมินก้า” ว่าเล่นว่าหยอกชู้มันอยู่ โห ทีนี้ไปยุกยุ่นยุกยุ่นอย่างใดก็ดักแซ็บ จะยะจะใดนี่ กูนี่เป็นโทษ ตกค่ำมาก็เอาไหมาใส่ เอาผ้าเข้าปก แล้วก็ไปอู้ชาวบ้านว่ามีไหเงินบ่รู้ว่าจะเอาไปไว้ที่ไหน กลัวเปิ้นมาปล้นมาจี้ กลัวเปิ้นมาลัก
“ละบ่าเดี่ยวนี้ มีที่ไหน”
“บ่าเดี่ยวนี้มีตั้งไว้ในเฮือนหั้นนา”
ทีนี้หมู่ขโมยได้ยินก็พากันเข้าไปหามไหล่น เอาล่องโต้ง ไอ่คนตวยก้นก็เอามือจกเข้าไป จวบใส่หัว ก็ว่า
“คนบะ คนบะ ล่น ล่น ล่น”
ไอ่คนอยู่ทางหน้าก็นึกว่าคนไล่ตวยมา ก็ล่นไปตึกๆ ไอ่คนหลังก็ว่า
“บ่ใช่นา คนอยู่ในนี้นา”
ก็ซัดลง บั้ง เมื่ออั้นก็พ้นเขตบ้านแล้ว อี่นั้นก็เลยบ่มีผัว