ประตูช้างเผือก

          ประตูช้างเผือกอยู่ใกล้ ๆ กับวัดกู่เต้าหั้นนะ ประตูช้างเผือกเปิ้นก็มีเล่าเรื่องเหมือนกันว่า เมื่อตะก่อนสมัยพระเจ้ากือนาเป็นเจ้าเมืองเชียงใหม่ จนเฒ่าจนแก่ก็ได้ตายไป เมื่อพระเจ้ากือนาตายไป พระเจ้าแสนเมืองเป็นลูก ก็ได้เป็นเจ้าเมืองต่อ อยู่มาได้แหมบ่เมินบ่นานเจ้าเมืองสุโขทัยก็เกิดศึกกับอยุธยา เจ้าเมืองสุโขทัยกลัวจะสู้เมืองอยุธยาบ่ได้ ก็ได้ส่งหนังสือไปหาเจ้าเมืองเชียงใหม่หื้อไปช่วยรบ แต่แล้วเจ้าเมืองสุโขทัยก็บ่ไปตีเมืองอยุธยาสักกำ ซ้ำร้ายปิ๊กมาตีเมืองเชียงใหม่เราแหม พระเจ้าแสนเมืองก็หนีออกจากที่ทัพสุโขทัยล้อมมาได้กับทหารสองคน เจ้าเมืองก็ได้ขี่หลังทหารตึงสองคนตวยกัน เปลี่ยนกันขี่คนนึ่งอิดแล้ว เปลี่ยนคนนึ่งขี่ต่อแหม จนมาถึงเมืองเชียงใหม่ เจ้าเมืองก็กึ๊ดถึงความดีของคนทั้งสอง จึงได้ตั้งหื้อเป็นขุนเจ้าฝ่ายขวา และขุนเจ้าฝ่ายซ้าย และได้แป๋งรูปช้างไว้เป็นสัญลักษณ์ ต่อมาช้างที่แป๋งก็ได้หักพังลงไป พระเจ้ากาวิละก็หื้อแป๋งช้างขึ้นมาใหม่ คือแป๋งช้างตัวเดียว แต่หื้อมีสองหัว ทาสีขาว เปิ้นฮ้องช้างเผือก ละก็ฮ้องหนตางที่มีช้างเผือกอยู่ว่าประตูช้างเผือก ถ้าไผใคร่หันก็ไปผ่อได้ ไปตามถนนเลยหน้าสนามกีฬาเทศบาลนครเชียงใหม่ไปหน้อยก็จะปะพอดี